MELO DRAMA PARDASNI INJIL I SIMALUNGUN

MELO DRAMA:

KILAS BALIK PARMASUKNI INJIL HU SIMALUNGUN

              

NA SINUSUNNI: PDT ITO BELIHAR PURBA

=========================================================

Gereja Kristen Protestan Simalungun bani Pesta Olob-olob 109 tahun pardasni Injil i Simalungun. Manatap hu lobei mangayaki sura-surani Tuhan ase gabe goluh na tongtong marpangarapan. Manaili hu pudi mangidah banggalni horjani Naibata bani Simalungun patubuhkon uhur sipartarima kasih  bani ganup gulmitni goluh.

(Marhata Gondrang…………………………………)

STAGE 1

SIMALUNGUN PAIMA PARMASUKNI INJIL HU SIMALUNGUN

NARATOR:    Dalanni Naibata manatap Simalungun marhitei juak-juakni, Pdt Henry Guillame, sahalak missionar NZG i tanoh Karo na mambontasi tanoh Simalungun  bani pardalananni hu Silindung,  manghadiri Rapat tahunan Missionar RMG. Ijin ma marhorja kuasani Tonduy Napansing, mambahen ipahona uhurni Missionar ai, ase ibaritahon ma Injil hu Simalungun

Adegan 1       (Missionar Henry Guillame mardalan mamboban bohal/ tas pakon tungkot na pondok janah mampardiateihon suasana pargoluhanni halak Simalungun, sipata mangeleng pataridahkon keprihatinan)

Guillame    :   Aih ale, jengesni tanoh Simalungun on, hape hagolapan ope manrungkupi sidea (mangeleng ma homa ia) I sudut pentas adong ma 2 halak  parinangon  tikki marbual-buali, talup manriahkon sada horja. Lanjar ijumpahi Tuan Guillame do sidea.

Guillame      : Horas ma bani nassiam!

Tapi lanjar lintun do sidea halani mabiar mangidahsi, talup gatni sahalak panjajah na sihol manangkap sidea. Guillame pe lanjar luar ma hun pentas

Narator        : Partahuakni dayok tandani mamungkah ari, mamuhoi ganup parjuma manoruskon nolih sadari. Pongkut do sidea ganup janah marhorja pe ringgas. Tapi sonin-sonin do hansa bulan hu bulan ronsi tahun hu tahun…

Adegan 2     : Mambontas i pentas 4 halak parjuma: sada remaja mamboban sangkul, inang manjujung karanjang, bapa mamboban tunggom janah dakdanak mamboan tatabu. Mardalan ma sidea ronsi das i jumajanah ipaturun inang aima karanjangni janah itatap ma jumani ai, talup adong na sihol ranggihononni. Lang piga dokah mintor roh ma niombahni  na remaja ai.

Remaja       :   Inang, au laho ma lobei mangosor horbouta na i diparni parmahanan ai tene nang!

Inang           : Dear ma ai  pa! (lanjar idohori niombahni ai) Tapi ingat, sanggah mambontas ho hun dalan kehen ai, lobei marsantabi da pa, “Tabi pung, ningon!” Ulang das lolei da  bapa, mintor do manggila ompung simada talun ai. Pojam do hita da!

Remaja       :   Eak nang! (lanjar laho manadingkon inangni ai)

Narator      :   Bueini biak na so madear na domma imamahkon humbani hadakdanakon nari, mambahen uhur biar na lambin martambah. Mabiar do bani simagot ni ompung na hinan na boi parohkon mara. Hayu-hayu na banggal gabe ianan habiaran halani adong do pangianni  lanjar ijai do ianan panggalangon, ase jorgit goluhni na manggalangkon on.

Music ----------------------------

Narator        : Pondokni sura-surani goluh, mambahen lang adong parjuangan. Sada dalahi maningon boi maburu janah pujion do anggo pistar ia mandihar. Sonai do homa naboru, anggo domma boi ia marjuma omei janah boi homa martonun na dear tumang ma ai.

Adegan 3a   :   Sekelompok anak boru (5 halak) membentuk lingkaran janah mardeideng ma sidea,  lanjar mandodingkon Deideng.

Adegan 3b  :   Ibagian sudut pentas taridah 3 halak dakdanak marsitekkah, margantih gantih sidea marsitekkah domu hubani aturan permainanni.

Adegan 3c   :   3 halak garama/ remaja iajari sada bapa mandihar.

Music ---------------------------

Narator          : Lang ope adong hamajuon bani goluh, dalan pe pitah dalan hu juma, parjumaon pe asal juma-juma. Tongon, lang jumpahan hamajuon anggo lang adong sura-sura

Adegan 4       : Sahalak inang mamakei bulang sapari, ibonting do homa binongeini, tikki i juma mangusir bodat. Talup songon na manggila do inang on halani parripasni omeini ai.

Inang:               Hei…. hei… hei… misir hanima humbai omei hon! (lanjar bertolak pinggang). Talup ma namin marpariama dua minggu nari, tapi sonaha ma bahenon, na suan hinan 2 rantei… in torih ma sanrantei na mando tading, in pe domma hona gagat sapartolu. Eheh… aha ma  holi sahapni bapani si Torsa? Marayoh ma tongon diri na songon on (lanjar marhoyam). Ah… aha pe na masa in, modom ma lobei au hu sopou an (lanjar lao manadingkon pentas).

Narator:          Pondokni  paruhuran mambahen pondok homa panonggor janah hurangni pangarusion mambahen goluhpe lang sai marhatontuan.

Adegan 5:        (Sada garama mardalan mamakei hiou na igulung, mulak hun partandangan modom. Irik garut-garut halani hiou/sarung na pinakeini domma gok tusa. Mandoding-doding do ia talup songon kasmaran). 

Torkis             :  Sarsarhon jambulanmu da hait silon-silonmu, pangkawahni matamu da sombuh pakon siholhu da botou… Ambit boi au rap pakoninang hu rumahni boru Garingging ai… tapi naha ma tene, hadorunan on ma mambahen langlang ganupan ai. (songon na marpikkir) tapi ai pe, panorangni ma gatni manjumpahkon ompung Joralam… (lanjar ijumpahkonma tongon ompung Joralam tikki hundul-hundul i rumahni)

Torkis             : Horas ompung!

Joralam          : Horas ambia! Ai aha do na porlu sedo na ulang!

Torkis             : Magodang ma angkula pung tapi danak tong pangidahni simbuei in. Ai dabuuh do uhurhu mangidah sada naboru na jenges tapi songon na lang dong do anggo uhurni hubakku.

Joralam          :  Ooo… domma huarusi ai ambia!

Torkis             :  On ma demban panungkunanhu hubamu ompung! (lanjar ijalo)

Joralam          : Ai pasal na mandihar domma ibotoh ho ambia, sonai homa age  marsulim?

Torkis             : Domma ompung, domma 3 taun huguruhon ai

Joralam          : Dear! (lanjar mubit-ubit ma ompung Joralam on)

                            On ma ambia, parmanisan on hubere hubam, pos ma uhurmu sai andohar jumpah ho sura-surani uhurmu!

Narrator:   Sonin ma pargoluhan na ijia, goluh na lang sai marhatontuan janah pargoluhan na tongtong dohor hubani hagolapan.

Music-----------------------------

STAGE 2

PERINTIS INJIL I SIMALUNGUN

Narator:              Dob isaksihon janah iparuhurhon Pdt Guillaume na masa i Simalungun, ipadas ma sura-surani uhurni hubani Nommensen selaku  Pimpinan Zending RMG ase ibaritahon ma Injil i Simalungun janah ihadearhon do pandapot ai.  Dob ai ipadas ma barita ai hu Jerman hubani Dr Schreiber – Direktur RMG. Siluk do ibalosi marhitei telegram na mangkatahon: “Tole! Den Timurlanden das evangelium” artini: “Tarolos ma! Baritahon ma Injil hu tanoh Simalungun”. Janah bani bani tanggal 23 Oktober 1902 das ma Pdt August Theis i Sumatera na itutus Zending RMG hun Jerman.

Music------------------------

Dob ijalo  sidea parentah hun  Jerman gabe ipungkah ma marhitei na manusun langkah-langkah na marpardomuan hujai. Bagian na parlobei ma ai maniar tanoh Simalungun janah manjumpahkon raja-raja i Simalungun mangindo izin ase ibaritahon Injil.  Nommensen sandiri do na mangkorjahon on riap pakon rombonganni, Tuan Guillaume , Pdt GK Simon, 23 halak ma sidea ganup.

Adegan 1: (Nommensen pakon rombonganni mardalan, songon langkahni na dob loja, mamboan  bohalni bei).

Nommensen:    Wir befinden uns derzeit schwierige Reise, durch Wald und Bergsteigen (Mahol do pardalananta sahali on, mambontas harangan mannaiki dolog)

Guillaume:          Du hast Recht, aber das Evangelium muß in Simalungun gepredigt werden (Tongon do ai tuan, tapi barita Injil maningon das do hu Simalungun)

Nommensen:    Wahre, was Sie gesagt (Tongon do nidok mu ai)

Narator:    Dob das sidea i Tiga Langgiung, idalani sidea ma tanoh Simalungun  mamungkah hun wilayah Raja Purba das hu Kerajaan Bandar. Buei do ragam sidompakhononni sidea laho mambuka dalan ase das barita malasni uhur hu Simalungun.

Adegan 2      :  Nommensen pakon rombonganni tiba i Purba janah siap-siap manjumpahkon Raja Purba

Nommensen        : Horas  Raja nami!

Tuan Rahalim        : Horas ma!

Nommensen        :  Ia parroh nami hujon aima mamboan barita malasni uhur, mambahen horja zending i tanoh Purba on.

Guillaume              :  Ia horja Zending on, parohkon hamajuon do bani  partuanon Purba, ai ipajongjong do sikolah janah ibobahon hanami do parugamaon na bonar bani nassiam

Tuan Rahalim        :  (Marpikkir-pikkir janah mampartimbangkon bagas-bagas bani uhurni  pasal tujuanni sidea na roh ai. Lanjar marsahap ibagas uhurni: “Na jalo ma lah tongon sidea on, tapi na uji ma tongon hasintongan na isobut sidea ai, baenon ma  lah sidea i Purba Saribu dohor sinumbah Sigiring-giring, atap na matei do sidea bahenonni ompunganni sinumbah in”) “Dear ma anggo sonai, tapi adong syarat hubani nasiam

Nommensen        : Aha ma ai Ja nami?

Tuan Rahalim        :  Baenon ma nasiam marianan i huta Purba Saribu, tar 6 batu do ai hunjon, ase ulang das iganggui begu pakon binatang na legan nasiam.

Narator:        Ihamalaskon sidea ma haputusan ai   marhasoman tarima kasih hubani Tuhan. Andohar torsa boi itanda halak Simalungun na i Purba hatani Tuhan in. Dob ai misir ma sidea use hu Raya, janah on ma na iarapkon gabe sasaran utama na gabe pusat Zending i Simalungun. Tarmur-mur do pasal Raja Raya na mabajan in, age pe domma niombahni manjolon harajaon tapi tong do iusih biak na koras in.

Adegan 3      :  Dob jumpah sidea raja Raya Tuan Soemajan, pae-pae do sidea padaskon aha na gabe maksud parrohni sidea ai.

Nommensen     :  Horas ja nami!

Soemajan           :  Horas ma tongon!

Nommensen     : Ia hanami on roh hun Zending RMG na i Silindung, sihol padaskon barita malasni uhur, aima hamajuon marhitei horja panogu-noguon ronsi padaskon  agama na sintong hubani nasiam ijon. (lanjar marsahapi ma sidea panjang lebar pasal tujuan on)

Narator      :  Parsangsian do anggo ibagas uhurni tuan Soemajan ai halani na dos do  pangahapni sidea na roh in pakon si bottar mata na manjajah ai. Tapi sonai pe ipikkirhon tuan Soemajan do bagas-bagas untung rugini parrohni sidea ai.

Soemajan  : (Marpikkir-pikir manundalhon sidea na roh ai, janah nini ma ibagas uhurni: “tongon tene, ujion ma lobei halak on atap na tongon do na sinobutni sidea ai. Bahenon ma  rumah bani sidea bani ianan Urung-urung nan gal,  bani lapang-lapangni begu-begu na dob matei). “Sonon ma ai ale si bottar mata: Jaloon pe nasiam anjaha bahenon ma ianan bani nasiam lang daoh hun rumah bolon on”.

Guillaume : Diatei tupa ma bamu tongon, iparsintong hanami ma hata mu in.  (lanjar isalam sidea laho mulak).

Narator      : Dob jorei parsahapanni sidea i Raya, itoruskon ma use manuju hu kerajaan Panei. Tapi idompakkon sidea do hamaholon mandompakkon raja on mardomu ma ai halani kondisi politik  pakon kolonial Belanda na hurang dear bani panorang ai, aima penolakan hubani pemerintah Belanda  na sihol mambahen perkebunan i Panei.

Adegan 4      :  Mardalan ma Nommensen , Guillaume pakon Pdt GK Simon manjumpahkon sada pengawal i kerajaan.

Nommensen     : Horas janah damei ma bani nasiam!

Pengawal            : Horas! Ai ise do nasiam

Guillaume           : Ia hanami aima missionar na sihol mamboban barita na madear domu hubani hamajuon ijon.

Pengawal            : Sottabi ma bani nasiam, raja nami tikki i pardalanan janah borngin ope das ijon

Nommensen     : Dear anggo sonai, ipaima hanami ma ronsi mulak raja ai

Pengawal            : Anggo sonai, bani rumah lapou an ma nasiam paimahon! (lanjar laho ma sidea hujai)

Narator   :  Lang piga dokah mintor doras ma udan janah bossotan do sidea i rumah pantangan ai. Tapi iulakkon sidea ma manjumpahkon pengawal ai gendo boi sidea i emperni rumah bolon ai ase ulang idabuhi udan janah ihadearhon pengawal on ma. Dob ai tarpodom ma sidea halani  domma bagas borngin. Tikki na tarpodom ai sidea, roh ma tuan Djontama raja Panei ai.

Djontama            : Oi....  (mamuhoi sidea marhitei naheini halani  topat i lobeini pintu masuk). Puho! Ise do hanima?

Nommensen     : (mintor puho ma sidea na dua songon na mabiar) Sontabni ma  bamu raja! Hanami siboan barita na madear do

Simon                   :  Ai na paimahon ham do hanami ijon janah halani bossot do hanami i rumah pantangan an gabe hujon hanami!

Djontama            :  Misir sibontar mata! Ulang idogei rumah on!

Narator : Dob dokah sidea marsipatureian pangarusion, tong do koras raja on janah mangusir sidea hun emper ai.

Nommensen     :  Dingat ma on! Itulak ham do nasinuruhni Naibata, na mamboan hagoluhan bamu! (Dob ai mulak ma use sidea hu rumah  pantangan ai lanjar ulakkkon bossot ma use sidea hona bah udan borngin ai)

Narator   : Bani ari patarni itoruskon sidea ma pardalanan. Tapi marsirang ma sidea gabe dua kelompok. Nommensen hu Bah Bulawan janah ijai ma ia pajumpah pakon Tuan Salain Saragih Garingging na manrajai Dologsaribu. Dear do panjaloonni Tuan Salain janah iizinkon ma zending RMG marhorja janah ibere ma Tigaras na gabe pangkalan bani zending. Hunjai torus ma ia hu Tigarunggu, hu Purba janah hu Haranggaol. Hunjai ma ia mulak hu Sigumpar.

Musik------------------------

Rombonganni Guillaume, Simon pakon Meissel manoruskon pardalananni sidea hu Siantar, tapi domma parlobei sidea gabe Silom janah itolak do kehadiranni sidea ijai.  

Ia parrohni sidea i Bandar ijalo do ibagas na dear oleh Tuan Saudin anjaha mengizinkon ase tading  ma i Bandar missionar janah Pdt GK Simon do saudni tading i Bandar.

Musik---------------------------

Bani bulan Juni 1903 iadognkon do use survey na paduahon laho mamastihon ganup parsahapan hubani raja-raja na dobni in. Bani ombas on ibobahon Guillaume, GK Simon janah dihut ma homa Pdt Agust Theis. Maol do pardalananni sidea mambahen marngayod angkula, tapi lang adong na engkar be humbani aha na dob isahapkon sidea  hinan. Sonin ma maolni mamungkah dalan ase das barita Injil hu Simalungun. Haganupan ai idompakkon sidea pitah ase jumpahan haluahon bangsa Simalungun. Iluh sonai age hadogas halani lojani, lang  gabe pangambati bani suruh-suruhniTuhan in, ase jumpahan hagoluhan halak Simalungun.

STAGE 3:

PARMASUKNI INJIL HU TANOH SIMALUNGUN RONSI PERKEMBANGANNI

Narator:    Dob isahapkon janah i evaluasi  hasil surveyni sidea ai gabe itotapkon ma Pematang Raya na gabe pusat sending i Simalungun – mardingat iananni na sangat strategis. Bani tanggal 1 September 1903 das ma rombonganni Pdt August Theis i Tigaras  naik kapal ni zending RMG na margoran TOLE rap pakon rombonganniDob ai mardalan ma sidea hun Tigaras menuju Pematang Raya mambolusi route Siambaton, Rajani Huta – Nagori – Bangun Panei – Bah Bulawan janah das hu Pematang Raya.

Bani ari Rabu 2 September 1903 das ma Pdt August Theis  i Pematang Raya. On ma na iperingati hita sebagai parmasukni  Injil hu Simalungun. (tikki mambasa on lewat ma rombongan naik kapal Tole).

Musik----------------------

Dob das ia i Pematang Raya, isaksihon ma goluhni halak Simalungun, isaksihon do homa horja adat bani na matei. Tongon, golap ope sidea i Simalungun. Janah maruhuri ma August Theis…

Adegan 1   : August Theis hundul, merenung, manjolom Bibel

Theis        : Dob husaksihon na masa bani halak Simalungun, gabe maruhuri ma ahu ibagas, aha do sura-surani Naibata bani halak Simalungun marhiteihon ahu na dob iutus hujon. Ale Tuhan pakei Ham ma au juak-juakMu on…

Narator   :  Dob ai ibuka Theis ma Bibel janah ibasa ma Johanes 4:35, janah on ma iahap balosni Tuhan bani na borat sijujungonni ase ibagas Kristus goluhni halak Simalungun .

Theis        : Ai lang ihatahon hanima: Ompat bulan nari jumpah ma pariama? Tapi huhatahon ma bannima: Mangkawah ma hanima, tonggor hanima ma juma in, domma gorsing, boi ma sabion (Joh 4:35).

Musik-------------

Narrator :  Bani tanggal 6 September 1903 iadongkon ma kebaktian na parlobei i  tanoh Raya, buei do halak na manangihon  age pe lape adong humbani sidea na mambere dirini gabe Kristen. Tapi age pe sonai totap do ia sabar paimahon horjani Tuhan, in na maningon do sabion.  Ia na gabe hambatan ase dokah ijalo halak Simalungun hakristenan:

-   Parsangsianni sidea pasal sibottar mata ai  na manganggap bahasa mata-matani panjajah Bolanda

-   Karakterni halak Simalungun na buei pamikirion, ai ningon pakkei-pakkei do lobei ipikirhon baru ope ihorjahon, ai sonai do podahni namatua

-   Bahasa Toba na ipakei Zendeling mambahen hurang tartarik sidea halani pangalamanni sidea anggo mardalan hu Siantar, somal do irampok halak Kristen Toba i Juma Sabah. Iahap  sidea do anggo Kristen (mar bahasa Toba homa) sarupa pakon panakko.

Musik…………..

Narator   :  Sada dalan mambahen ase boi sidea iajari pasal Kristen aima PENDIDIKAN. Iajari ma sidea bani piga-piga na patut: mambasa, maretong,pasal na marjuma, kebersihan, pengobatan pakon na legan.

Adegan 2         : Theis jongjong, manjolom buku, mangajari aksara Latin hubani piga-piga dakdanak pakon remaja

Theis        :  Suratkon nasiam ma lobei hurup A (ipausih Theis ma marhitei na manuliskon bani papan tulis!

Murid 1   :  Maol do tuan! Urupi ham ma tongon au (lanjar iurupi Theis)

Murid 2   :  Ai aha do gunani on tuan pala maningon botohon nami pasal on, ai mahua iajari ham hanami sonaha pasal na maragad (tartawa haganup murid-murid ai)

Theis        :  Dear hubanta ganup. Sonari masuki hita ma hubani parlajaran Kristen

Murid 3   :  Ai aha do in? Ai lang iarusi hanami anggo in

Theis        : Tangihon nasiam ma ale, ia barita on aima barita haluahon janah on  do agama na bonar, aima Jesus Kristus, anakni Naibata na dob manompa hita janah Ia do na pagoluhkon hita. (irik tikki mangkatahon ai, marlintunan ma sada-sada humbani muridni ai)

Murid       : Bamu ma in tuan, ai lang ibere inang hanami marlajar pasal Kristen. Manggila do holi  simagodni ompung nami anggo manlembang hanami. (misisr ma haganupan janah tading ma Theis)

Narator   :  Age pe sonin na masa na idompakkon Theis tapi lang ongga ia mundur. Porsaya do ia sada panorang holi  sai na tarjalo sidea do Tuhan Jesus.

Musik…………….

Narator      : Tongon, dokah do paimaon ase  adong pangarusionni sidea pasal ha Kristenon. Salah sada strategi na ibahen aima penginjilan hubani kelompok bangsawan: keluarga raja, partuanon, parbapaan (partuanon), pangulu-pangulu. Age pe domma piga-piga sidea na domma sirsir isobut Kristen tapi lape ope sirsir tardidi.  Tongon gabe sada pargumulan do on bani Theis  na sai tong mangarap kuasani Tuhan ma marhorja patorsahon ganup in.

Music…………………

Adegan 3: Roh buei halak manuktuk rumahni Theis janah tarolos ma Theis mambuka. Adong na deba mangombah dakdanakni, dong homa manogu na boritan.

Theis        :  (lanjar mambuka pintu) Iah… masuk ma nasiam! Ai aha do na masa

Bapa         :  Sontabi tuan nami! Ai ibogei hanami adong do tambar-mu na beteng pamalumhon

Inang        :  Ai do tuan, tonggor ham ma niombahkon, milas tumang domma 3 ari

Bapa         :  Niombahkon pe lalap do magin-magin, batuk2on torus

Theis        : (lanjar mambuat kotak obat). Hujon ma tongon (lanjar idadap ma na milas tumang do tongon). On jalo ham, (lanjar ijalo) ipangan ma on 3 x sadari dob mangan ia. On pe hubamu inang, bere ham ma bani niombah-mu in tambar on, ulang sai marmilasi lobei.

Inang        : Tarima kasih ma tuan Tais!

Theis        : Dear! Mintor tarolos ma ge lah nasiam, sedo na ulang  ijon. (lanjar mintor misir ma sidea)

Narator  :  Sonin ma nanget-nanget dapot uhurni jolma in mambahen gabe tarjalo sidea habujuronni Theis sekaligus hakristenon ai. Dob dokah lambin buei ma halak na marsikolah halani domma iojur  marhitei harapatan urung, ase ulang ilanglangi niombahni marsikolah. Sonai do homa age Tuan Soemajan Saragih raja Raya tuan hapoltakan ai, dihut do niombahni marsikolah bani sikolah zending ai.

                      Music…………………..

                      Bani 11 September 1910 2 halak Simalungun sihol manoruskon parsikolahanni hu jenjang na lobih tinggi aimaDjaulung Saragih pakon Paulus Purba janah ididi ma sidea. Dob ai masuk ma sidea hu Perguruan Teologia i Narumonda.

Adegan 4    : Theis mamakei toga mandidi 2 halak Simalungun). Lanjar mandidi halak Simalungun na domma mambere dirini mangihutkon Kristus

Theis        : Ham Djaulung Wismar Saragih hu didi ma ham hubagas goranni Naibata Bapa pakon Tuhan Jesus Kristus ampa Tonduy Napansing, amen  (lanjar manampeihon tanganni).

                   Ham Paulus Purba, hudidi ma ham hubagas goranni Naibata Bapa pakonTuhan Jesus Kristus ampa Tonduy Napansing, amen.

Narator   : Bani 4 Juni 1911 ididi ma homa Djason Saragih na sihol manlanjutkon sikolahni hu Sikolah Guru i Depok Jawa Barat. Dob ai hampir ma bani ganup huta jongjong parsikolahan anjaha lambin mangarusi ma halak Simalungun pasal artini  hamajuon sonai homa panjaloonni sidea bani Hakristenan.

Music……….

               Dob ai buei ma use na mambere dirini manajalohon zending, Tuan Riahta Damanik i Sidamanik (1907) na manjalo zending ibags na dear. Buei ma homa na mambere dirini  ase tardidi  tarlobih ma ai humbani kelompok partuanon: Tuan Gajoes Purba pak-pak pakon keluargani i Hinalang (1912), Tuan Salain Saragih Garingging  tuan Dologsaribu  tahun 1913 (niombahni Raja Rondahaim Saragih Garingging), Tuan Riah Kadim Damanik  raja Siantar 1915, Tuan  Poesia Saragih Garingging – tuan Hutadolog. Humbani pegawai pemerintahan aima Djaudin Saragih (saninani Djaulung Saragih), sonai do homa buei humbani pangulu-pangulu.  Das hubani tahun 1913, dob 10 tahun Theis i Raya, 90 halak ma na domma tardidi bani 11 kuria.

Music………

                            Sonin ma martambah-tambah torus halak na porsaya i Simalungun  marhitei missi zending RMG na menempatkon missionaris i Simalungun. Pdt August Theis i Pamatang Raya, Weissenbruch i Sipiak-Parapat pakon hu Tanoh Jawa, Pdt H. Guillaume i Nagasaribu,  janah Pdt GK Simon i Pematang Bandar.

                            Manrarat do tongon horja Zending i Simalungun na gabe sejarah banta na ihaholongi Tuhan Jesus raja Gereja in do goluhni halak Simalungun

Adegan 5      : Haganup pemain melo drama jongjong i pentas janah marsijoloman tangan lanjar mangkatahon: “Selamat Ulang Tahun Injil i Simalungun! Horas ma GKPS! Horas ma banta haganupan!!

www.itobeliharpurba.blogspot.com