TATA IBADAH 60 TAHUN GKPS HANGTUAH 2012

TATA IBADAH ULANG TAHUN GKPS HANG TUAH RESORT POLONIA MEDAN

MINGGU EXAUDI, 20 MEI 2012

PRAELUDIUM

Marmalasni uhur janah marmegah-megah ma hita, ai tangkog nuan hita hu rumahni Jahowa. Boan ma mandera hamonangan in, tortorhon hita ma tortor pangalo-aloon  janah dodingkon hita ma inggou malasni uhur. Tonggor ma na jongjong do rumahni Jahowa anjaha marsinalsal do in ronsi taun hu taun. Hunjin do mungkahni hadearon ronsi hagoluhan; ai lang marnabois bohal i rumahni Jahowa. Eta tangkog ma hita hu rumahni Jahowa.

ROMBONGAN PROSESI MAMASUKI RUANGAN IBADAH

SL.       Mandodingkon "Ijon nuan hanami"  + Panortor mambobai rombongan prosesi

            Ijon nuan hanami o Tuhan, roh manombah hu lobeiMu

            Tangkog hu rumah na pansing in, bai iananni Jahowa

            Jongjong do nuan hanami on, i lobeini horbanganMu

            Rap pakon puji-pujian in, inggou pakon tortor nami 2x

1.       VOTUM - INTROITUS - TONGGO

P.        Ibagas goranni Naibata Bapa pakon Tuhan Jesus Kristus ampa Tonduy Napansing

PK.     Sitompa langit pakon tanoh on. Amen

P.        Puji ma Jahowa na markuasa bani hotak hamuliaonNi

K.       Na marsinalsal ronsi hu ujungni tanoh on

P.        Puji ma Tuhan Jesus onjolanni gereja  

K.       HarajaonNi do na manggoki tanoh on

P.        Tonduy Napansing na manramotkon ganup kuria in

K.       Sai marmulia ma sibobahon tonduy hasintongan in

-------------------- Mandodingkon: “O Ale Tonduyhu” -------------------------

P.        Puji ma Jahowa na pajongjongkon kurianNi GKPS Hang Tuah

K.       Na padomuhon hauhuronni na parlobeita ibagas kuasani Tonduy

P.        Na mamilih saksi Bani, laho pararatkon Hasitongan in

K.       Puji ma Jesus Kristus batu parsuhini kuria in

---------------------- Mandodingkon: “O Ale Tonduyhu” -----------------------

P.        Marianan do Jahowa ibagas rumahni na pansing ai, i nagori atas do paratas ni Jahowa; manatap do panonggorni, sai ipareksa pangkidop ni matani do anak ni jolma in

K.       Ipuji hanami do Jahowa na manramotkon goluh nami

P.        Martonggo ma hita: Ham Tuhan Naibata, Jahowa sitimbulan in; ipajongjong hanami do manara pamujion nami hu Bamu, ijin  lambin itanda hanami ma ganup hinadearni layakMu. Ham do na gabe bonani malasni uhur nami bani panorang on, ai Ham do na mamungkah ronsi na manramotkon pardalananni kuriaMu na domma 60 tahun mansinalsalhon goranMu. Ale Tuhan Jesus Kristus Raja ni gereja, sai marmulia ma goranMu janah sangap i tongahni bangsa-bangsa. Marhitei parjongjongni kuriaMu in, lambin isaksihon ma torus bannami kuasaMu in, gogoh nami marayak parrohMu magira. Tarpuji ma Ham Tuhan!

PK.     Amen

2.       MANDODING Hal No. 407,1-2

Puji ma Jahowa Tuhan Naibata, ai marjumbalang do goranNi in

Haganupan jolma sai marsombah ma, sai hagoluhkon hataNi in

Holsoh haganupan mambur, tubuh ma malasni uhur

Gok bai pangarapan holong na totap, rap mangolobkon goranNi in

Ningon do marsombah bani Naibata, puji ma Ia pargogoh do in

Ulang marnaloja sai irikkon ma, rap mambalosi hataNi in

Holsoh haganupan mambur, tubuh ma malasni uhur

Gok bai pangarapan holong na totap, rap mandodingkon Haleluya!

3.       HASASAPANNI  DOSA

P.      Roh ma hita hu lobei-lobeiNi Tuhanta, ibagas toruh pakon undukni uhur, mangaku ganup dosa-dosanta, ganup hahuranganta mandompakkon Tuhan, sonai homa bani horja i kuria in

SL.    Mandodingkon: “Tuhan Papangkei Ham Pikkiranhu”

P.      Tuhan Naibata na mangkaholongi hanami, gok dosa do hanami i lobei-lobeiMu. Hotop do lang itangihon hanami Hata pakon TitahMu in, manlembang hanami humbani dalan hasintongan in

K.      Idalani hanami ari-ari nami ibagas goluh na so manrantei, harosuh nami hansa idalankon hanami. Holong ma Ham bannami Tuhan!    

PK.    Sonin pe totap do isarihon Ham goluh nami

P.      Ise ma hanami on i lobei-lobeiMu? Gok habutakon do hanami janah lang talup hanami i lambungMu

K.      Sipardosa do hanami na sai tong manundalhon hasintonganMu in

PK.    Idompakkon Ham do tong bohiMu in hubannami

P.      Tong-tong do pamangan nami mamuji goranMu tapi parlahou nami lembang; biaran do hanami bani  goluh na i tanoh on

K.      Marsipakulah-kulah use hanami ase ulang taridah ganup dosa nami

PK.    Totap do itogu-togu Ham goluh nami

P.      Ham Tuhan, lang tarboban hanami diri nami hu lobei-lobeiMu

--------------------------- hening -------------------------

P.      Bueini halilian i tanoh on ronsi bueini husip-husip na gati mambahen lang marpangidah janah lang  marpanangar hanami bani dilo-diloMu. Lang homa itangihon hanami panggorani uhur ibagas diri nami…

K.      Rosuhan do tong hanami mangayaki goluh parsatongkinan

P.      Songon sanggar simoduk-oduk, lanjar do hanami mubah-ubah

K.      Lang tarjolom hanami padan nami mangihutkon Ham, ai mabiar do hanami mandompakkon kuasani tanoh on

P.      Maol do bannami pahotkon goluh nami pitha bani kuasaMu

K.      Rosuhan hanami pitah mar-ibadah marimbang patorsahon hauhuron nami

PK.    Lang tarboban hanami diri nami hu lobei-lobeiMu

------------- Mandodingkon “Tuhan Papangkei Ham Pikkiranhu -------------

P.      Tatap Ham ma hanami Tuhan bani ganup hahurangan pakon dosa nami in, ase ulang magou hanami humbani idopni uhurMu in

K.      Dosa sipakulah-kulah na adong bannami, mambahen hanami margijangni uhur, lang be hamuliaonMu in iboan hanami bani  goluh nami

P.      Bahen Ham ma hanami marhabiaran huBamu pakon mangkapokuthon horja i tongah-tongahni kuriaMu

K.      Sura-surani uhur nami do na gati ipasaud hanami i tongah-tongahni garejaMu, sangsi ope hanami mangondoskon lobih humbani panorang ronsi sinadongan nami

PK.    Holong ma Ham hubannami Tuhan, sasap Ham ma dosa nami na banggal in

P.      Roh ma hanima, ase marturiak hita, nini Jahowa. Age pe gerger dousanima songon bunga ni dapdap lopak do bahenonku ai songon salju, age pe gerger songon hiou hasumba, putih do bahenonku ai songon kapas. Hasangapon ma bani Naibata i babou!

PK.    Amen

4.       MANDODING HAL NO 440,1-2

Ija do jumpah parsaranan sonai ampakon hasonangan

Sai ganup tikki  ge ganup panorang, margantih soluk roh ni  paruntolon

Sompong tartawa tapi lang madokah, holsoh marganjang mamingkirhon goluh

Lao mansarihon haganup na hurang, lanjar do lalap lang marhasungkupan

Seng jumpah hita in bai goluh, anggo lang roh hita bai Jesus

Gok bai Tuhanta do in haganupan, mambere goluh na marhasungkupan

Anggo sonai bai Jesus ma roh hita, mangindo aha do na porlu banta

Sirsir do Jesus mangurupi hita, asal ma Ia tong parsuhutanta

5.       TONGGO TARIMA KASIH

P1.    Na ijia tahun 1935 jongjong ma sada sarikatni halak Simalungun i kota Medan, ipakei Naibata do sidea on na gabe uratni parhongjongni kuriaNi GKPS i kota Medan. Marsitohu-tohuan anjaha marhasadaon ibagas goranni Tuhan. Hunjin ma mungkahni ase  tubuh hauhuron na humbani Tonduy in ase jongjong garejani Simalungun. Ihargahon Tuhan in do hita songon bangsaNi janah ibere do tanganNi mangurupi ase saud sura-suraNi.

Hasaksian pasal horja in, in ma na talup paratahon nami bani goluhni ganup kuriaMu, ase iahapkon hanami sonaha pambobaionMu hubannami.

P2.    Mardingat bani na parlobeita in, ipakei Tuhan do sidea marhitei na mambere tuk ni gogohni sidea, panorang pakon sinadonganni sidea. Talup songon pambobaini bangsa Israel bani pardalanan manuju tanoh bagah-bagah in. Tuhan do na marhorja i atasni haganupan in, ase jongjong kuriaNi anjaha mansinalsalhon sondangNi in. gogoh pakon hadogasni sidea gabe pasu-pasu hubani ginomparni. Hatani Tuhan do mungkahni habotohon, mambuka hauhuron pasal goluh na talup. Pasu-pasuNi do na mambobai kuriaNi das hubani na sonang.

SL.    ---------------------- Mandodingkon “HolongMu Tuhan” ----------------------

P.      Martarima kasih do hanami hu lobei-lobeiMu Tuhan ai domma 60 tahun kuriaMu jongjong

K.      Sihol do Jahowa marianan bani lampo-lampo na pansing in, lang anjai morod hatunggungonni hunjin

P.      I rumahMu on do hanami manrogop mambobankon diri nami, ijon do hanami mangadu-adu hubani Naibata na mangkaholongi hanami

K.      Bani rumah na pansing in do isasap Ham dosa nami, ijin do ipapansing Ham hanami lopak songon kapas

P.      Ganjang ma  pardalananni kuriaMu Tuhan tapi bani ganup ari do iidopi Ham kuriaMu

K.      Iuhirhon Ham do goranMu i rumah na mapansing in, marsinalsal das bani hauhuron nami

P.      Toguh do nahei ni Jahowa jongjong i  tanoh on, ianan pangunsandeianni bangsaMu

K.      Idopni uhurnNi lang marnamubah, ai Ia do pangaduanni na masombuh

P.      60 tahun ma kuriaMu GKPS Hang Tuah, iahapkon hanami do  ganup dearni layakMu

K.      60 tahun tarbogei sorani Naibata marhitei ambilan na madear

PK.    ------------------------ Mandodingkon “HolongMu Tuhan” ------------------------

P3.    Sibere-bereni Tuhan do in hubanta, ilayak-layakhon marhitei idopni uhurNi. Rumah na mapansing iananni Jahowa, in do iananta mandompakkon Tuhan in. Domma apala  jongjong toguh, siteanonni  ganup kuria in. Kuriani Tuhan… jimot ma baen nasiam in! Jampung nasiam ma horja i rumahni Tuhanta, ai seng marnabois bohal ijin tapi ipalar Tuhan do gogohni sipanabi ase bosur haganup na roh hu rumahni Jahowa.

P4.    RumahMu Tuhan pansing do in, ipapansing Ham do na masuk bani rumahMu. RumahMu Tuhan tunggung do in janah ipatunggung Ham do ganup na roh ibagas undukni uhur. Halani ai, ganup bapa, inang, pemuda pakon sikolah Minggu,  patalup hita ma dirinta marsada-sada, goluhta pe gabe goluh na gok sondang na humbani Kristus in ma, pangkei manlangkah janah borsih maruhur.

PK.    ----------------------- Mandodingkon “HolongMu Tuhan” -----------------------

P.      Humbani gokni uhur nami do mamuji Ham bani ianan na pansing in janah malasni uhur nami marjullak-jullak songon bah tubuh.

K.      Marsurak-surak do tonduy nami mandodingkon: “Ai pardear layak do Jahowa, ronsi sadokahni-dokahni do idopni uhurNi”

P.      Tarpuji ma Tuhanta, Selamat Ulang Tahun pa-60 kon GKPS Hang Tuah

PK.    Ai pardear layak do Jahowa, ronsi sadokahni-dokahni do idopni uhurNi. Amen

6.       MANDODING: TONDUY NAPANSING (tor-tor)

Tonduy Napansing mambere gogoh

Lao pararatkon hatani Naibata

Sai jalo  ham ma in baen gantarmu

Age borat horjamu in, ulang pala mabiar ham halani in

Jesus do na mangurupi ham ijin, mambere gogoh hubamu

Ase dear ma unduk uhurta

Laho manjalo Tonduy Napansing in

Sirsir hita ganup manjalo in

Buei ope sagang nuan, sihol sipatorsaon bai kuria in

Roh ma Ham ase rombang hita ganup, lao mandalankon hata in

Ham Tuhan useihon Ham ma TonduyMu

Tonduy Napansing bannami on (bannami on)

Ase tambah gogoh tongon; ulang sagang horja tongon

Paturei Ham kuriaMu… Tuhan

7.       MANAKSIHON HAPORSAYAON

-          Pembacaan Sejarah GKPS Hang Tuah

-          Acara Khusus Pelepasan Tugas Pangidangionhubani 2 halak Sintua

-          Tingting Kuria

-          Kreasi Sekolah Minggu (optional)

8.       MANDODING HAL NO 115,1-4

Sadokah ho i tanoh on papintor uhurmin

Padingat-dingat ma tongtong nidokni Tuhan in

Sai songon hayu dear ho ramos parbuahniin

Bulungni pe tabun homa usiho ma sonin

Buei do hadearonni bah tubuh in tongtong

Pausih dirimin hujin baen uhurmin sintong

Ambugkon humbai uhurminna son margagan in

Ganup na humbai Tuhan in ramot ma jaga in

9.       AMBILAN: Pdt DR Jaharianson Saragih, MSc (Ephorus GKPS)

10.   PATUMPUHON GALANGAN

P.      Totap do ipasu-pasu Tuhan goluhta ari lopus ari janah isarihon do goluhta marhiteihon aha na talup jaloonta. Martarima kasih ma hita hubani Tuhan in halani totap ope parohkon pasu-pasu tanoh na lambutan in, tanoh na binagahkonNi hubanta. Halani ai jimot ma baen hita pasu-pasu in, janah ganup limbuahni horjanta ondoskon hita ma ai hubani hasangaponni Tuhan in.

PK.    Bamu ma galangkononku galangan puji-pujian anjaha  goranni Jahowa ma padilo-diloonku. Bagah-bagahku bani Jahowa hugalarima…

P.      Sonari patumpu hita ma galanganta…

         ------------------- Doding pakon Tortor -----------------

     

11.   TONGGO PANUTUP

P.               Martarima kasih do hanami halani domma 60  tahun hata na madear in ondos i  tongah-tongahni kuriaMu GKPS Hang Tuah, tangkas ma nuan panonggor nami bani holongMu na mambobai pardalananni goluh nami

K.              Na gabe hataridahanni tarimakasih nami pataridahon nami ma goluh na mangunsagahkon Ham. Gabe pasu-pasu ma hanami bani hasoman jolma

P.               Gabe saksi ma hanami bani ganup dear layakMu, parsahap pakon pangabak nami

K.              Marsiurupan pakon marsihaholongan songon Kristus, sonin ma homa goluh nami

P.               Eta, misir ma hita mangambilankon ganup horjani Tuhan in, hobas ma hita haganup

K.       Sari bani ganup horjani Tuhan anjaha marmalasni uhur mangkorjahon in

PK.     Ase ipatangkas  hanami, Ham do Raja na manggomgomi tanoh on

SL.      Mandodingkon: “Ayak do uhurhu Bamu” (ay 2)          

           Nuan roh use hanami, marsombah hu lobeiMu Tuhan

           Ai lang halani bueini siluah nami, nai ge dear gabei

           Idopni uhurMu ale Tuhan

P.               Halani domma 60 tahun hataMu ondos bannami

K.              Magodang ma hanami ibagas panandaion huBamu marhitei na pataridahkon goluh sipartarima kasih

P.               Siparholong janah sari bani hasoman na galek

K.       Sari janah simada holong i tongah-tongahni keluarga

PK.     Ai sada do hanami idilo Ham bani harajaonMu in

P.        Bani panorang on, ipatumpu hanami do   galangan nami na gabe tandani tarima kasih nami, Sai jalo anjaha pasu-pau Ham ma in laho manggoki pardalanni horja i tongah-tongahni kuriaMu. Ojur anjaha paingat Ham ma tong-tong hanami, ase parlobei hanami mangondoskon diri nami gabe galangan na manggoluh i lobei-lobeiMu. Ai parlobei do Ham mambahen in hubannami marhitei darohMu in.

PK.     Mandodingkon: -----

P.        Ham Bapa nami na i nagori atas, sai na papansing ma goranMu, …..pst

PK.     (mandodingkon) Ai Ham do simada harajaon…. pst

P.        Jalo nasiam ma pasu-pasu… Amen

PK.     (Mandodingkon) Amen-amen-amen

POSTLUDIUM (Marsisalam-salaman)

Mandodingkon: Hal. No. 411:1

Diatei tupa ma Bamu Ham Naibata,

mambaen tupa humpulan nami on

Igomgom Ham do horja nami on torsa,

gok malas uhur do hanai ijon